Gærdagurinn var nú hálfgerður letidagur hjá mér! Rigningin sem lamdi gluggana mína efldi mig ekkert sérstaklega í því að kíkja á dagskrá menningarnætur.

Þrándur og Sölvi fóru í hlaupið og voru ánægðir með sig eftir það. Aron fór í Garðinn að keppa í fótbolta - svo það vorum við minnsti maður sem vorum heima.

Við hjónin áttum 11 ára brúðkaupsafmæli svo það var ákveðið að grafa í kistunni eftir spennandi mat í tilefni dagsins. Enduðum á skötusel og lúðu sem Þrándur eldaði eftir uppskrift - smakkaðist alveg ljómandi.

Veðrið var orðið hið skaplegasta eftir matinn svo við höfðum samband við Guðrúnu vinkonu mína og ákváðum að skella okkur saman í miðbæinn og horfa á flugeldasýninguna með eigin augum.

Legg ekki meira á ykkur.....við tókum strætó (unglingurinn harðneitaði að koma með) og hittum Guðrúnu og Hafrúnu dóttur hennar í Lækjargötunni. Allt gekk eins og í sögu - við héldum bara vel í hendurnar á börnunum!

Sýningin var hin flottasta og eftir hana var lítið annað að gera en að forða börnunum úr miðbænum. Við þurftum að skipta í klink og fórum inn í 10-11 í Austurstræti. Þar var hið mesta kraðak af unglingum sem voru nú ekki besta fyrirmyndin fyrir okkar börn, svo við vorum fegin þegar við komumst á strætóstoppistöðina. Guðrún og Hafrún löbbuðu beint upp í sinn vagn og skömmu síðar kom okkar; gat ekki passað betur. EEEEEEN........................................síðan hvenær krussar ellefan allan Vesturbæ Reykjavíkur?????????

Þrátt fyrir brjálaðan bílstjóra með bensínið í botni vorum við 25 mínútur á leiðinni heim!

Þetta var voða gaman en  - ég held að við horfum bara á flugeldasýninguna í fréttunum næst!