Ég verð nú illa svikin ef þreytuhrukkunum hefur ekki eitthvað fækkað í þessu vetrarfríi!!!
Eftir að hafa þegið heimboð hjá henni Auði á fimmtudagskvöldið og farið gangandi um hættulegar götur Fossvogsins vopnuð regnhlífinni einni saman, þá lagðist ég hreinlega í leti sem stendur enn yfir!
Elmar ákvað að sýna sínar bestu skaphliðar þannig að engin ástæða var til þess að senda hann á leikskólann á föstudaginn (haha) og var drengurinn hæstánægður með að fá að vera heima og dunda sér. Aron passaði á meðan ég fór í klippingu í hádeginu en svo fóru þeir í heimsókn til ömmu sinnar á meðan við Sigga frænka kíktum í Ikea.
Ég hafði auðvitað steingleymt að Þrándur hafði ætlað með bílinn í skoðun þann daginn svo hann varð að koma til mín og sækja bíllyklana sem voru í vasanum mínum. Við Sigga vorum rétt lagðar af stað í gönguna um búðina og það reyndist svo sannarlega ekki auðvelt að finna leiðina út með lyklana - endaði með því að ég fékk manninn í barnagæslunni til að rétta honum þá í gegnum lúgu á veggnum!!
Það tók okkur tvo tíma að skoða alla búðina og maður genginn upp að hnjám, ætluðum að tylla okkur niður og fá okkur hressingu - en þurftum að standa við barborð......bara í boði að sitja inni í búðinni!
Sölvi og Aron gistu hjá ömmu sinni aðfararnótt sunnudags og ég kíkti í "frænkuboð" til Evu. Þar voru mættir flestir í móðurættinni minni sem eru á aldrinum 18 - 42. Skemmtilegt að hittast svona og greinilega nauðsynlegt að plana það, því ekki droppa allir við hjá öllum - því síður eftir því sem aldursmunurinn er meiri!
Jæja nú er einn dagur eftir af fríinu. Óveðrið er gengið niður. Á morgun ætlum við að fara með föt í Sorpu og reyna að minnka poka og kassaflóðið sem fyllir hér öll horn!!
Býst við að Elmar verði bara í fríi líka. Hann stakk allavega upp á því!!
2 hafa lagt orð í belg