Mátti nú til með að bæta inn færslu svona af því helgin á eftir er líka liðin!!

Vikurnar líða svolítið hratt núna - senn líður að því að fermingarundirbúningur heimilisins verði á síðustu stundu! Ekki verður þá hægt að kenna þeim um sem standa að markaðssetningu þess sem oft tilheyrir veislum í tilefni ferminga, því póstur merktur okkur hjónum og oft fermingarbarninu ratar nú inn um lúguna hjá okkur vikulega. Veisluþjónustur, ljósmyndari, blómaverslanir - allir keppast um að gefa okkur afslátt ef við komum og verslum við þá!

Sá þáttur sem snýr að trúnni sjálfri er ræktaður á sunnudögum og miðvikudögum - og einskorðast við fermingarbarnið sjálft - á það ekki að vera miðpunkturinn í þessu öllu saman! :)

Helgin var svona letihelgi - of kalt til að fara út í dag! Reyndar fóru elsti og miðjumaður á stjá. Sá yngsti sagði það mér að kenna að hann hefði misst af útiveru í dag - ég var of sein að finna á hann föt! Hann taldi of mikið að klæða sig sjálfur "alla daga" jafnvel þótt 5 ára afmælisdagurinn sé á morgun!!

Reyndar er afmælisspenningurinn í hámarki - enda búið að telja dagana lengi! Við ætlum að halda upp á afmælið um næstu helgi -  á  laugardaginn og loksins núna er afmælisbarnið farið að skilja að húllumhæið verður helgina eftir sjálfan afmælisdaginn sem hann er búinn að hlakka mikið til! Þetta er nú flókið fyrir litla kolla! :)

Þá er vinnuvikan framundan með bollum, saltkjöti og búningum!